Ítalskir kokka kynna sér fiskinn okkar
Í byrjun desember komu tveir ítalskir kokkar frá Campania héraðinu til Íslands í þeim tilgangi að kynnast fiskveiðum og vinnslu og landinu almennt. Þeir eru meðal dyggra kaupenda og bjóða upp á íslenskan saltfisk á veitingastöðum sínum. Heimsókn þeirra tengist markaðsstarfi fyrir saltaðar þorskafurðir sem Íslandsstofa sinnir í samstarfi við söluaðila og framleiðendur.
Vincenzo Russo er frá veitingastaðnum Baccalaria í Napólí og Vincenzo Nocerino frá veitingastaðnum Laconda Nonna Rosa í Somma Vesuviana. Báðir veitingastaðirnir sérhæfa sig í að bjóða mikil úrval saltfiskrétta og er um fjölbreytta flóru að ræða undir alþjóðlegum áhrifum, m.a. grískum og taílenskum. Kokkunum var boðið til landsins bæði til að kynnast framleiðslu á gæðaafurðum úr þorski en einnig til að miðla til okkar hefðum á Ítalíu í meðhöndlun og eldun á saltfiski. Tilgangurinn er að þeir geri upprunalandinu Íslandi hátt undir höfði og efli kynningu á íslenska fiskinum í samstarfi við Íslandsstofu í byrjun næsta árs.
Starfsfólki af íslenskum veitingastöðum og þátttakendum í markaðsverkefninu var boðið í sýnikennslunni í Salt eldhúsi þar sem Ítalirnir elduðu sex rétti hvor. Í framhaldinu munu þessir veitingastaðir gera saltfiski hærra undir höfði á veitingastöðum landsins og geta þá þeir fjölmörgu Suður Evrópubúar sem sækja Ísland heim upplifað saltfiskinn hér á landi.
Ítalirnir heimsóttu sjávarútvegsfyrirtæki og vinnslur bæði á Höfn og í Reykjavík og hittu framleiðendur í verkefninu sem gátu miðlað þekkingu og fróðleik um hráefnið. Þeim gafst einnig tækifæri á að skoða landið og kynnast öðru hráefni s.s. tómataframleiðslu, rúgbrauðsgerð, skyri og súkkulaði. Heimsóknin tókst mjög vel í alla staði og voru þeir þakklátir fyrir að hafa verið valdir til ferðarinnar, en verkefnið mun bjóða völdum kokkum og veitingastöðum til samstarfs í kynningu á íslenskum afurðum. Hafa þeir báðir verið iðnir við að miðla upplifun sinni af Íslandi á samfélagsmiðlum og í sínum „kreðsum“ á heimaslóð.